

من بینـیسین اوشاقیـم،نچه گون لر قوناقیـیم
بینیس ده چوخ جوان ایگید ،بینیس لینین بوداغییم
اورگیم اوردان چالوشور،داغلاری من لن دانیشور،
باغلاری من لن باریشور ،من عاشق گول باغییم
گلمیشم مـن ای بینیـس ،داراخ چکم تلـّریوه
حیران ائـولام ،باغچا،باغا ،نظرسالام گولّریوه
آخیرسولار ،بولاغوندان ،هامی باخار سـلّریوه
قـربان ائـولوم ،مـحبتدی ،طایفالارا ،ئلّریوه
آغاشلارون اوجااوجا ،اونا باخار جوان ،قوجا
کهلیک لرین ،گُوَرچینین ،کول دیبیندن هارا اوچا؟
میشوداغی،باشدان باشا،کهلیک اوچارداشدان داشا
ائـوکوزلرین جوتدن گلیر ،تـماشادور ،قوشا،قوشا
اتحادون سرین سویـی ،حلقه حلقه واردی قویـی
آغـاشلارون میـوه لری ،لذّتی وارچوخلی سویی
عاشوق لارون گلر سسی ،نه گوزل دی جوان طویی
آداخلی لار ،گلین قیزلار ،گلیرگدیر ،کوچه بویی
شربت وریرسرین بوزدان،تعریف اِدیر گلین قیزدان
عم اوغلودان،دای اوغلودان،بی بی قیزی عم قیزی دان
ساری کوینک آبی شلوار،آلابولوز،قیرمیزی دان
بگ آلمانـی آتا گرک ،آق آلمادان ،قیرمیزی دان
کوراکن دن ،قین آنادان ،انعام آلیر قین آتادان
انعـام آلوب تعریف ادیر ،هم آنادان ،هم آتادان
اوشاقلارون شوقا گلیب ،دام دیواری یاوور ادیر !
قیز آدامی اگلشیب دور،آدام یاوور قاب باجادان
شاقّا بورکی ایری گویوب ،عباسقلی یگین گدیر
ددیم طویا گلمه میسن ؟ددی ساق ئول،سویوم گدیر
سوتوتاجام باغچالارا،سوسوز قالوب،باغچالاروم
اوغلان اوردا شاما گلیب ،بگ اوغلانا سلام یتیر
من گلمیشم یاد ایلییم،قونشی لاری ،قوهوم لاری
بیرده گورم بوستانوندا ،قارپوزلاری ،قوون لاری
دسته دسته گدن داغا ،سوری سوری قویون لاری
اینک لری ،بیـزولاری ،کرپه لری ،قوزولاری
کندیمیزین کوچه لری ،بوروخ بوروخ تنـگه لری
کَردی قیـراقـوندا،اکن ،کدولاری ،مَکَه لری
آق تپراق دان اتاقلاری ،دیرک لـری پردی لری
یل استیرر پرده لری،ریحان مرزه ،کَردی لری
دیه سویی کند اوسته وار ،هرنه ایسته سن بینیس ده وار
آلما ،حیوا هلو آلی،قوز بادامی ،اوست اوسته وار
شیرین اریک ،آلموت ،آلچا ،قیزول گول لر غنچاغنچا
قوون قارپوز،آرپا بوغدا ،ایولر ده وار بوخچابوخچا
بیوک مسجد ،میداندا دور ،آخوند آباد یانوندا دور
لوله کشی سویی ده وار ،هرکس سویی یانوندادور
یاخجی قاتوق ،یاخجی کره ،یاخجی پنیر یاخجی تره
یاخجی داوار کسر قصاب ،ات ایسته سن یانوندا دور
یاخجی حمام ،مخابرات،بانکی ده وار چکیر برات !
سوری قویون داغ دان گلیر ،چوبان می نیب قیرمیزی آت !
مریضخانا دبیرستان ،راهنمـائی هم دبستـان
هنرستان ،یاخجی یرده ،بیوک سالن ،بیوک حیاط
بانی سی ده بیاضیان ،گلیر اورا درس اوخویان
هم کدّی لر ،هم شهری لر ،هم شبستر ،هم صوفیان
پیام نور دانشـگاهی ،تازا گلیـب کندیـمیزه
کد دگیلی شهر اولوب ،وار اللری ،بانی قویان
بیرگون واریدی درخشانی،اولسون قبری نورافشانی
خدمت الیب بینیسلیه ، یاخجیلوقدان وارنشانی
ئولوب گدیب رحمت اونا ،نچه لری یرینده وار
بوائللرده زحمت چکن، اولسون قبری گول افشانی
بنیس لی ده قدرین بوله ،یرلرینـی یاخجی سوره
حاصیل ورر یرله ریمیز ،یاخجی اوخوب ،یاخجی بوله
بنیس لی نین فرهنگی وار،بیرکس یوخدی منّت قویا
احسان یولی همیشه وار ،درک ایلیین ،چیخار چوله
بینیس لی لرهمت الیب ،آسفالت الیب جاداسیـنی
قربان اولـوم همـت تیـزه ،آلـوم منده قاداسینی
چینی دن باش شهرتی وار،حسن باباقاب لارونون!
قابچی میدانونا چیخدوم ،بلکه گئورم کاساسینی
البیز باشی صفالیدی ،بنـیس اهـلی بفـالیدی
تبریز ،تهران جادا سون نان ،دمیریولی آرالیدی
قره کهریز بولاغوندا ،یایلانموشدوم قراغـوندا
گئوزوم قالدی بیر گوزل ده ،هچ بولمدیم هارالیدی
جیحون سویی زینالیدی،قبرستان نان آرالیدی
خامنه یولون گوره بولسن ،بینیس لینین مارالیدی
گوی داشدا وار،گوزل باغلار ،آیری دوشون ئلدن آغلار
گوی داش اوسته چوخ الّشیب،اورگ اوردان یارالیدی
حسنـوون گدیک لری،تزیتـیشر اریـک لری
خرمن اوسته اویناخ لیری،خوروز،تویوق، فریکلری
آرزولادوم بیرده گئـورم ،امامزادا تپـه سیـنی
ناخوریولاغونان گلن،سوری سوری اینک لری
امامزادا نون گونبزی ،اونان سونرا اوزون بازی
نه گوزل دورعلی گُلون ،هم پائیزی، هم ده یازی
عاشوق لارون گلیرسسی ،هم قاوالی ،هم ده سازی
سِرچه گول اوستونده اولوب ،بولبولونن هم نوازی
یونـجا لاری بسته بسته ،قارا قوشلار دسته دسته
بول بوللر گوزل اوخیری ،غنچالانان گول لر اوسته
گوزوم قالوب قلم قاشدا،گول عنبرین گوزه باشدا،
قره چایدان اوجاقوندا ،کاباب چکم کول لر اوسته
کشکلانون صفاسی وار،یرلرینـین بـهاسی وار
چشمه سینین باشون گئورسن ،نه گوزل بیرهواسی وار
بینیس ده بیرگوزل چشمه ،اونان سونراسن سوایشمه
قیدارسویون قدرین بولون،مین بیر ایکی دواسی وار
اوزگه گلیب ، کشکلانا ،کریم نولدی قیهـالانا
دَلی سوزون دوزون دییر،سیزبیر باخون دوزیالانا
دوزسوز ددی اولدی دلی ،بینیس ده کی مش خلیل آقا
اشّک لری وورانـماساز، تاپتالویون سیز پالانا
مایانبارون درین قویـی،بال شربتـه دَیَرسویـی
چراغ کیمـین یانار اوردا،ئوزوم نری قانابویی
باغلار قراغوندا دوروب ،هم وانتی هم موتوری
سبد سبد گلیر اوردان ،آلما حیوا ،بامادوری
امیّ دارون دره لری ،موو لوخلارون بره لری
داش کلمی،گولبسری،ریحان مرزه تره لری
داش کلمین آشون ایشدیم ،ایشکنه دن هچ دویمادوم
قالوب دادی داماغومدا،قغورمانون قره لری
پیشده لردن گده بولسن ،داغ اتگین گوره بولسن
شعله چکیرلاله لری ،سن قدرینی بوله بولسن
دولدیرمیری منبع لری ،مالاّجانون آزدی سویی!!
چای سویی ده آخار گلر ،سن دَیَرین بوُله بولسن
ایاق قابون آش تابیـنی،سحر تزدن آش قاپیـنی
اوتای دا بیر گوزل سو وار،آشابولسن داش قاپیـنی
قومنی تپه واردور اوردا،اوشقون گُوَوریبدی قاردا
سُوزی تاپوب دره بولسن ،دولدورارسان آش قابیـنی
اکینچی لر شوخوم ،وورار ،اون نان سورا سَپر دنی
بهار گلیب ،قیش چیخاندا،یاد ایلیین سیزده منی
(واحد) سن یاز تعریف ایله، کندیمیزین گوزللرین،
شوقی اولان تاپار سنی ، ذوق اولماسا آتار سنی
نويسنده : X.C.R |
تاريخ : پنج شنبه 13 بهمن 1390برچسب:, |
نوع مطلب :
<-PostCategory-> |
|